პროცედურის მიმოხილვა

სელექციონერს განაცხადი ცხოველის ან მცენარის ახალი ჯიშის რეგისტრაციისა და მოწმობის მიღების მოთხოვნით საქპატენტში შეაქვს პირადად ან წარმომადგენლის მეშვეობით.

განაცხადი საქპატენტში შეტანილად ჩაითვლება იმ დღიდან, როდესაც წარდგენილია შემდეგი მასალები:

ა) განცხადება;

ბ) ცხოველის ან მცენარის ახალი ჯიშის შეთავაზებული დასახელება;

გ) ცხოველის ან მცენარის ახალი ჯიშის აღწერილობა.

საქპატენტში ცხოველის ან/და მცენარის ერთ ახალ ჯიშზე ორი ან ორზე მეტი განაცხადის შეტანის შემთხვევაში პრიორიტეტი მიენიჭება იმ განაცხადს, რომელიც უფრო ადრე იქნა შეტანილი.

სელექციონერი, რომელსაც სურს ისარგებლოს მცენარეთა ახალი ჯიშების დაცვის საერთაშორისო კონვენციით დადგენილი პრიორიტეტით, ვალდებულია საქპატენტში განაცხადი შეიტანოს ამ კონვენციის მონაწილე ქვეყანაში განაცხადის წარდგენიდან 12 თვის განმავლობაში.

საქპატენტი ატარებს განაცხადის ფორმალური მოთხოვნების ექსპერტიზას, რაც მოიცავს საგანაცხადო მასალების სისრულის და გაფორმების შემოწმებას, განაცხადის შეტანის თარიღის დადასტურების ჩათვლით.

საქპატენტი განაცხადის შეტანის თარიღს ადასტურებს მისი შეტანის დღიდან 2 სამუშაო დღის ვადაში. განაცხადის ფორმალური მოთხოვნების ექსპერტიზა ტარდება  განაცხადის შეტანის დღიდან 1 თვის ვადაში.

ფორმალური მოთხოვნების ექსპერტიზის სტადიაზე განმცხადებელს ან მის წარმომადგენელს ეგზავნება შეტყობინება-მოთხოვნა მასალებში აღმოჩენილი ხარვეზების აღმოფხვრის შეთავაზებით. თუ დადგენილ ვადაში (1 თვე) ხარვეზები არ გამოსწორდება განაცხადზე საქმის წარმოება შეწყდება. თუ ხარვეზები გამოსწორდება, პრიორიტეტი დადგინდება ხარვეზების გამოსწორების მომცველი მასალის წარმოდგენის თარიღით.

თუ დადასტურდა, რომ განაცხადი აკმაყოფილებს ფორმალური მოთხოვნების ექსპერტიზის პირობებს, საქპატენტი ცხოველის ან მცენარის ახალი ჯიშის შესახებ მონაცემებს აქვეყნებს ოფიციალურ ბიულეტენში.

ცხოველის ან მცენარის ახალი ჯიშის შესახებ მონაცემების ოფიციალურ ბიულეტენში გამოქვეყნებიდან 3 თვის განმავლობაში ნებისმიერ პირს აქვს უფლება, საქპატენტს წარუდგინოს წერილობითი შედავება.

განაცხადის ფორმალური მოთხოვნების ექსპერტიზის დასრულებისა და საგანაცხადო მასალების ოფიციალურ ბიულეტენში გამოქვეყნების შემდეგ ცხოველის ან მცენარის ახალი ჯიში 2 კვირის ვადაში გადაეცემა  აკრედიტებულ პირს გამოცდის ჩასატარებლად.

თუ საქპატენტში შეტანილი განაცხადი ეხება ჯიშს, რომელიც სელექციონერის უფლებით დაცულია სხვა ქვეყანაში და აკრედიტებულმა პირმა უკვე ჩაატარა გამოცდა   განსხვავებულობაზე, ერთგვაროვნებასა და სტაბილურობაზე,  ასეთ ჯიშზე შესაბამისი ქვეყნის კომპეტენტური ორგანოს მიერ გაცემული, სელექციონერის უფლების დამადასტურებელი ოფიციალური საბუთის დამოწმებული ასლი და მისი ქართული თარგმანი წარედგინება საქპატენტს განაცხადთან ერთად ან განაცხადის შეტანის დღიდან 2 თვის ვადაში.

ცხოველის ან მცენარის ახალი ჯიშის გამოცდის დადებითი დასკვნის შემთხვევაში საქპატენტი იღებს გადაწყვეტილებას  ახალი ჯიშის რეგისტრაციის შესახებ. საქპატენტს შეაქვს ცხოველთა და მცენარეთა ახალი ჯიშების რეესტრში და გასცემს მოწმობას, რომელიც სელექციონერის განსაკუთრებული უფლების მფლობელის საკუთრების დამადასტურებელი დოკუმენტია.

ცხოველთა და მცენარეთა ახალი ჯიშების რეესტრში შეიტანება:

ა) ახალი ჯიშის გვარი და სახეობა;

ბ) ახალი ჯიშის დასახელება;

გ) ახალი ჯიშის აღწერილობა და ფოტოგამოსახულება;

დ) სელექციონერის სახელი და მისამართი;

ე) რეგისტრაციის ნომერი და თარიღი.